လောင်းကစားဥပဒေသစ်နဲ့ သိထားသင့်သောအချက်များ

/ /

မေ ၇ ရက်နေ့မှာ ပြည်ထောင်စုလွှတ်တော်ကနေပြီးတော့ ၂၀၁၉ ခုနှစ်အတွက် ၁၃ ခုမြောက် ဥပဒေအဖြစ် လောင်းကစားဥပဒေကို အတည်ပြုလိုက်ပြီဖြစ်ပါတယ်။ ဒီဥပဒေသစ်ပြဌာန်းလိုက်မှုနဲ့အတူ ၁၉၈၆ ခုနှစ်လောင်းကစားဥပဒေကို ဖျက်သိမ်းလိုက်ပါတယ်။
ဥပဒေသစ်မှာ ပါဝင်တဲ့ သိထားသင့်တဲ့အချက်အလက်များထဲကအချို့ကို ကောက်နုတ် ဖော်ပြလိုက်ပါတယ်။
၁။ကံစမ်းကစားခြင်း၊ ကျွမ်းကျင်မှု တစ်ခုခုကို အကောက်အစားယူကစားခြင်း၊ အကောက်မယူပဲ ကစားခြင်းနဲ့ ဒီအလုပ်တွေကို ငွေကြေးအတွက် သို့မဟုတ် ငွေကြေးကဲ့သို့ တန်ဖိုးရှိသောပစ္စည်းတစ်စုံးတစ်ရာ အတွက် လောင်းကစားပြုလုပ်ကြခြင်းကို လောင်းကစားလို့ အဓိပ္ပာယ်ဖွင့်ဆိုပါတယ်။ ဂျင်၊ဖဲ၊အန်စာ၊ မာကျောက်၊ တိုကင်၊ ဒင်္ဂါး၊ ဇယ်ပြား၊ ကစားခုံ၊ ကစားခွက်၊ ဇယားကားချပ်၊ သေတ္တာ၊ ပုံစံ၊ လက်မှတ်၊ စာရင်း၊ အီလက်ထရေနစ်ပစ္စည်နဲ့ ဆက်သွယ်ရေးဆိုင်ရာနည်းပညာသုံးပစ္စည်းတွေကို လောင်းကစားကရိယာတွေအနေနဲ့ သတ်မှတ်ပါတယ်။
၂။ အများပြည်သူနဲ့ သက်ဆိုင်တဲ့နေရာတွေမှာ လောင်းကစားလုပ်ရင် ဝရမ်းမပါဘဲ ဖမ်းဆီးနိုင်တယ်။
၃။ ကာစီနိ်ုများကို ပြည်ထောင်စုအစိုးရအဖွဲ့ခွင့်ပြုချက်နဲ့ ဖွင့်နိုင်တယ်။ မြန်မာနိုင်ငံသားများ ကာစီနိုမှာ ဝင်ရောက်လောင်းကစားခွင့်မ့ပြုပါဘူး
၄။ ထီနဲ့ ထီလိုမျိုး အခြားကံစမ်းနည်းတစ်ခုခုကို ငွေကြေးအကျိုးမြတ်ယူပြီး ဒိုင်ခံတာ၊လောင်းကြေးထပ်တာ၊ စီမံခန့်ခွဲတာလုပ်ခွင့်မပြုပါဘူး။
၅။ အများနှင့်ဆိုင်သောနေရာမှာ လောင်းကစားတာပြစ်မှုထင်ရှားရင် ထောင် ၁ လကနေ ၆ လအထိ ပြစ်ဒဏ်ချမှတ်ရမည်။ဒီအပြင် ကျပ် ငါးသောင်းအထိ ငွေဒဏ်လည်းချမှတ်နိုင်တယ်။
၆။ လောင်းကစားလုပ်ဖို့ အိမ်မှာ ဝိုင်းဖွဲ့လုပ်ရင် ထောင် ၆ လမှ ၁ နှစ်အထိ ချမှတ်နိုင်တဲ့အပြင် ကျပ် ငါးသောင်းကနေ ကျပ် တစ်သိန်းအထိဒဏ်ရိုက်နိုင်တယ်။
၇။ ကာစိီနိုမှာ လောင်းကစားလုပ်ရင် ထောင် ၁ နှစ်ကနေ ၃ နှစ်အထိ ချမှတ်နိုင်တဲ့အပြင် ကျပ် တစ်သိန်းကနေ ကျပ် ငါးသိန်းအထိလည်း ဒဏ်ရိုက်နိုင်တယ်။ ထပ်လုပ်ရင် ထောင် ၃ နှစ်ကနေ ၅ နှစ်အထိချမှတ်မည့်အပြင် အနည်းဆုံးကျပ် ငါးသိန်းကနေ ကျပ် ၁၀ သိန်းဒဏ်ရိုက်မယ်။
၈ ။ ထီနဲ့ထီလိုမျိုး ကံစမ်းနည်းကို ဒိုင်ခံတယ်၊ လောင်းကြေးထပ်တယ်၊ အကျိုးအမြတ်ယူဆောင်ရွက်ရင် ထောင် ၁ နှစ်ကနေ ၃ နှစ်အထိ ချမှတ်နိုင်တဲ့အပြင် ကျပ် တစ်သိန်းကနေ ကျပ် ငါးသိန်းအထိလည်း ဒဏ်ရိုက်နိုင်တယ်။ ထပ်လုပ်ရင် ထောင် ၃ နှစ်ကနေ ၅ နှစ်အထိချမှတ်မည့်အပြင် အနည်းဆုံးကျပ် ငါးသိန်းကနေ ကျပ် ၁၀ သိန်းဒဏ်ရိုက်မယ်။
၉။ သတင်းပေးတဲ့သူနဲ့ ဖမ်းဆီးရာမှာပါဝင်တဲ့သူတွေကို ပြည်သူ့ဘဏ္ဍာအဖြစ် သိမ်းဆည်းတဲ့ငွေနဲ့ ပစ္စည်းတွေကနေပြီးတော့ ၁၀ ရာခိုင်နှုန်းနဲ့ ၂၀ ရာခိုင်နှုန်း အသီးသီးဆုချီးမြှင့်မယ်။

သတင်းသမားတစ်ယောက်အနေနဲ့ ဘာတွေ လုပ်နိုင်မလဲ
ကျေးလက်ဒေသမှာ ပွဲဈေးတန်းတွေမှာ ဘုရားပွဲတွေမှာပျော်ပွဲရွှင်ပွဲအတွက် ဆောင်ရွက်တဲ့ လောင်းကစားဆန်ဆန်လုပ်ငန်းလေးတွေလည်း ပါဝင်လာပါတယ်။ သတင်းသမားတစ်ဦးအနေနဲ့ ဒီဥပဒေ အသက်ဝင်ခြင်းမဝင်ခြင်းကို ရပ်ကွက်ထဲက ပွဲဈေးလေးတွေမှာ ဒီလိုလုပ်ငန်းလေးတွေ အမြောက်အများတွေ့ရခြင်းရှိတော့တယ် မရှိတော့ဘူးနဲ့ ပထမဆုံး ဥပဒေရဲ့ အသက်ဝင်မှုကို တိုင်းတာနိုင်ပါတယ်။ ယေဘုယျအားဖြင့် ပွဲဈေးတန်းတွေကို အခွင့်အကောင်းယူပြီး ဒီလို လောင်းကစားဝိိုင်းလေးတွေ ပေါ်လာတာဖြစ်ပါတယ်။ နောက်တစ်ခုကတော့ ကျေးလက်ဒေသအပါအဝင် မြို့စွန်ရပ်ကွက်တွေမှာ နာရေးကို အကြောင်းပြုပြီး ဖဲဝိုင်းထောင်တတ်ကြပါတယ်။ တစ်ခါတစ်ရံမှာ နာရေးအိမ်အတွက် လူစည်ကားပြီး အားပေးအားကူဖြစ်တယ်ဆိုပေမဲ့ များသောအားဖြင့် လာရောက်ဖဲရိုက်သူတွေဟာ ကြေးစားလှည့်လည်ရိုက်သူတွေပဲဖြစ်ပါတယ်။ ဒီလို လူမှုရေးနဲ့ ရောထွေးနေတဲ့ လောင်းကစားဝိ်ုင်းတွေကိုရော ဥပဒေသစ်က ဘယ်လိုအကောင်အထည်ဖော်မလဲဆိုတာ စိတ်ဝင်စားစရာကောင်းပါတယ်။
နောက်တစ်ခုကတော့ အင်တာနက်ပေါ်မှာ အွန်လိုင်းဂိမ်းတွေ၊ အွန်လိုင်းမှာ လောင်းကစားဒိုင်တွေ ကျယ်ကျယ်ပြန့်ပြန့်ဆောင်ရွက်လာတာ ဒီဘက်နှစ်ပိုင်းတွေမှာ တွေ့ရမှာဖြစ်ပါတယ်။ ဒီလုပ်ငန်းတွေဟာလည်း တရားမဝင်ဖြစ်တဲ့ အတွက် ဒီလိုလုပ်ငန်းတွေနဲ့ ပတ်သက်ပြီးတော့လည်း သတင်းသမားတစ်ဦးအနေနဲ့ ချဉ်းကပ်ရေးသားမယ်ဆိုရင် စိတ်ဝင်စားစရာကောင်းပါတယ်။
ဒီဥပဒေသစ်ရဲ့ အထူးခြားဆုံးအချက်ကတော့ ပြည်ထောင်စု အစိုးရရဲ့ ခွင့်ပြုချက်နဲ့ ကာစီနိုကို တရားဝင်ခွင့်ပြုပေးနိုင်တယ်ဆိုတဲ့ အချက်ပဲဖြစ်ပါတယ်။ ကာစီနိုနဲ့ အကျိုးအမြတ်၊ ကာစီနိုနဲ့ အခွန်အခဆိုင်ရာ ကိစ္စတွေ၊ တစ်ညထဲနဲ့ အကျိုးအမြတ်အများဆုံးရသွားတဲ့ လောင်းကစားသမားစတဲ့ ကိစ္စရပ်တွေဟာ လာမည့်နှစ်တွေမှာ ရေပန်းစားမယ့်သတင်းတွေပဲဖြစ်ပါတယ်။ သို့သော်လည်း ကာစီနိုနဲ့ ဆိုင်တဲ့ နည်းပဒေမှာ ဘာတွေပါမလဲဆိုတာ စောင့်ကြည့်ရမှာဖြစ်ပါတယ်။ နည်းဥပဒေကို ဟိုတယ်နှင့်ခရီးသွားလုပ်ငန်းဝန်ကြီးဌာနနဲ့ အလုပ်သမား၊ လူဝင်မှုကြီးကြပ်ရေးနဲ့ ပြည်သူ့အင်အားဝန်ကြီးဌာနတို့ ဦးဆောင်ပြီးရေးဆွဲမယ်လို့ သိရပါတယ်။

လောင်းကစားဥပဒေ အပြည့်အစုံကို အောက်က link မှာ ဒေါင်းလုတ်ရယူနိုင်ပါတယ်။

Facebook Comments